Сәуір айында азық-түлік тауарларының бағасы

АСТАНА. Мамырдың 4-і. ҚазАқпарат /Қанат Мәметқазыұлы/ ‑ 2010 жылғы сәуір айында еліміздегі азық-түлік тауарларының бағасы 2009 жылғы сәуірмен салыстырғанда 5,3 пайызға өсіп отыр.

Бұл туралы ҚазАқпарат Статистика агенттігінің баспасөз қызметіне сілтеме жасап хабарлайды.

Келтірілген мәліметтерге қарағанда, 2010 жылғы сәуірде 2009 жылдың сәуірімен салыстырғанда баға қантқа - 33,8 пайыз, кофе, шай және какаоға - 14 пайыз, кондитерлік өнімдерге - 8,6 пайыз, тоқаш пен ұн өнімдеріне 6,5 пайызға өскен. Бұдан бөлек, алкогольді ішімдіктерге бағаның артуы 6 пайызды құраса, сүт өнімдеріне - 5,5, май және тоң майға 4,6 пайыз деңгейінде қалыптасқан. Керісінше, бағаның төмендеуі ұнға 17,4 пайыз, жармаға - 6,1 пайыз, нанға - 2,8 пайыз, жемістер мен көкөністерге - 1,6 пайыз, макарон өнімдеріне 0,6 пайыз шамасында байқалды.

Сонымен бірге, есепті кезеңде ет және ет өнімдері бағасының өсімі 8,8 пайызды құрады. Шошқа етіне баға деңгейі - 11,3 пайыз, шұжық өнімдеріне - 7,6 пайыз, қой етіне - 4,5 пайыз, жылқы етіне және құс етіне 3 пайыз көрсеткіш бойынша жоғарылаған.