Семей мектептерінде 2025 жылға дейін 800 спорт секциясы ашылады
СЕМЕЙ. ҚазАқпарат – Семей қаласындағы мектептерде 2025 жылға дейін 800 спорт секциясы ашылмақ, деп хабарлайды ҚазАқпарат тілшісі.
Бұл жайлы халық алдында есеп берген қала әкімі Бақытжан Байахметов мәлімдеді.
«Мемлекеттің негізгі бағыттарының бірі – бұқаралық спортты дамыту. Қаламызда тұрғындардың спортпен айналысуы үшін тиісті жағдайлар жасалған. Бүгінгі күні Семей бойынша 392 жабық спорт ғимараты жұмыс істеп тұр», - деді ол.
Бақытжан Байахметовтың айтуынша, Юность кентінде жеке кәсіпкерлердің қаражаты есебінен бассейні бар сауықтыру-ойын-сауық кешені салынды. Биыл Қайнар ауылында құны 397,4 млн теңге болатын 80 орындық дене шынықтыру-сауықтыру кешенінің құрылысы жүргізіліп жатыр.
«Шүлбі кентінде осындай тағы бір кешеннің құрылысы басталды. Бұқаралық және балалар спортын дамыту үшін 2025 жылға дейін мектептерде кезең-кезеңімен қосымша 800 спорт секциясын ашу жоспарланып отыр. Сондай-ақ алдағы уақытта үстел теннисі орталығының құрылысы көзделуде. Осы жылы сметалық құжаттама әзірленеді деп күтілуде», - деді әкім.
