Семейде бір аптада айыппұлын төлемеген 93 жүргізуші жаяу қалды
СЕМЕЙ. ҚазАқпарат – Семей қаласында бір аптада айыппұлын төлемеген 93 жүргізушінің көлігі арнайы тұраққа қойылды, деп хабарлайды ҚазАқпарат тілшісі.
Қалалық Полиция басқармасы баспасөз қызметінің мәліметіне сүйенсек, соңғы аптада шаһар аумағында тәртіп сақшылары, жеке сот орындаушылары және прокуратура өкілдерінің қатысуымен «Айыппұл төле» шарасы өткізілді.
«Соның аясында полиция қызметкерлеріне айыппұл бойынша 57 767 279 теңге қарызы бар 3826 адамның тізімі жолданды.
Рейд барысында 1,1 млн теңгеден асатын 110 әкімшілік айыппұл өндіріліп алынды. Жеке сот орындаушыларына жалпы сомасы 3 767 122 теңгені құрайтын 226 қаулы жіберілді», - деп хабарлады ведомство өкілдері.
Апта ішінде әкімшілік құқық бұзушылықтар бойынша көп мөлшерде берешегі бар 93 жүргізушінің автокөлігі арнайы тұраққа қойылды.
