Семсерлесуден Азия чемпионатында қазақстандықтар 5 медаль алды
Алматыда семсерлесуден жастар арасында Азия чемпионаты өтті. Қазақстан командасы бес медальді қанжығасына байлады. Kazinform агенттігі бұл туралы Ұлттық олимпиада комитетінің ресми сайтына сілтеме жасап хабарлайды.
Азия чемпионатына 17 елден 200-ден астам спортшы қатысты.
Қазақстан командасы екі «күміс», үш «қола» жеңіп алды.
Атап айтқанда, шпагамен семсерлесуден ерлер және әйелдер командасы екінші орынды иеленді. Александр Савин, Кирилл Павлов, Александр Федотов пен Никита Жулинский ерлер командасының құрамында өнер көрсетсе, әйелдер атынан София Николайчук, Владислава Андреева, Александра Тамбовцева мен Каролина Фомина жүлдеге таласты.
Александр Федотов шпагамен семсерлесуде жеке сайыста қола жүлдегер атанды.
Қылышпен семсерлесуде ерлер және әйелдер командасы жеңіс тұғырына үшінші болып көтерілді. Медаль иегерлері – Қайша Жәнібек, Полина Ко, Диляра Исабекова, Адема Серікбай, Нұрмұхамед Жайлыбай, Қайназар Нұрқатұлы, Артур Чупраков және Қуаныш Ергешбай.
