Сенат депутаттары Ұжымдық қауіпсіздік ұйымына қатысты бірқатар құжаттарды қарады

ТАНА. 8 қазан. ҚазАқпарат /Айдар Оспаналиев/ - Парламент Сенатының Халықаралық қатынастар, қорғаныс және қауіпсіздік комитетінің отырысында «1992 жылдың 15 мамырындағы Ұжымдық қауіпсіздік келісіміне өзгерістер мен толықтырулар енгізу туралы хаттамасын ратификациялау туралы» заң жобасы мен «2002 жылдың 7 қазанындағы Ұжымдық қауіпсіздік ұйымы келісімінің Жарғысына өзгерістер мен толықтырулар енгізу туралы хаттамасын ратифифкациялау туралы» заң жобасы талқыланды.

Отырыс барысында Сыртқы істер вице-министрі Амангелді Жұмабаевтың айтуынша, Ұжымдық қауіпсіздік келісіміне өзгерістер мен толықтырулар енгізу туралы хаттамасы 2010 жылы 10 желтоқсанда Мәскеуде жасалған. Аталмыш құжат талаптарына сәйкес, бір немесе бірнеше мемлекеттің тәуелсіздігі мен тұтастығына және тұрақтылығына қауіп төнген кезде немесе Ұжымдық қауіпсіздік ұйымына мүше елдерге, сондай-ақ әлемге қауіп төнетін болса, бірден бірлескен консультациялар тетігі іске қосылады. Нәтижесінде мемлекеттер өздеріне төнген қауіп қатердің алдын алу бағытында тиісті шешім қабылдайды. Сондай-ақ келісім талаптарына сәйкес, ұжымға мүше елдер қауіп төнген мемлекетке қажетті әскери және өзге де көмектер көрсететін болады.

Отырыс барысында сенаторлар екі құжатты да жалпы отырыста қарау қажет деген байламға келді.