Сенат Ұлттық банк төрағасы қызметіне Данияр Ақышевты тағайындау туралы Елбасының ұсынысына келісімін берді
АСТАНА. ҚазАқпарат - Бүгін Сенаттың жалпы отырысында ҚР Президенті Н. Назарбаев ҚР Ұлттық банкі төрағасының қызметіне Данияр Ақышевтың кандидатурасына келісім беруді сұраған болатын. Бұған Палата депутаттары өз келісімін берді. Еске сала кетейік, ҚР Конституциясына сәйкес, ҚР Президенті ҚР Ұлттық банкі төрағасының кандидатурасын ұсынып, Сенат бұған келісімін беруі тиіс.
«Бүгін Қазақстан Республикасының президенті өзінің Жарлығымен ҚР Ұлттық банкінің төрағасы Қайрат Нематұлы Келімбетовты қызметінен босатты. Конституция нормаларына сәйкес, ҚР Ұлттық банкі төрағасының қызметіне келісімін алу үшін Президенттің ұсынысы шығарылып отыр», - деді осы мәселе бойынша Парламент Сенатында сөз сөйлеген ҚР Президенті Әкімшілігінің төрағасы Нұрлан Нығматулин. Бұл ретте Президент Әкімшілігінің басшысы Елбасы ҰБ төрағасына кандидат ретінде Ақышев Данияр Талғатұлын ұсынғанын жеткізді. Талқылаудан соң сенаторлар Елбасы ұсынысын бірауыздан қолдады.
Еске сала кетейік, ҚР Президентінің баспасөз қызметі таратқан хабарламаға сәйкес, Елбасы өз ұсынысын Сенатқа білдіріп: «Ол Қазақ басқару академиясын бітіріп шыққан. Ұлттық банкте 18 жыл қызмет етсе, соның 7 жылында төраға орынбасары болып жұмыс істеді. Қазіргі уақытта Президент Әкімшілігінде қызмет етіп келеді. Еліміздегі экономикалық мәселелерді де жан-жақты зерттеген, елдің жағдайын да біледі», - деген болатын.
