Сенат Вьетнаммен сотталғандарды беру туралы заңды мақұлдады
АСТАНА. KAZINFORM – Бүгін Сенаттың жалпы отырысында «Қазақстан Республикасы мен Вьетнам Социалистік Республикасы арасындағы сотталған адамдарды беру туралы шартты ратификациялау туралы» Заң мақұлданды.
«Жалпы қылмыстық салада халықаралық шарттар үш бағытты қамтиды. Біріншісі – қылмыстық істер бойынша құқықтық көмек көрсету, екіншісі – қылмыс жасап, шетелде жасырынып жүрген адамдарды ұстап беру, үшіншісі – сотталған адамдарды беру туралы. Бұған дейін 2017 жылы Қазақстан мен Вьетнам арасында құқықтық көмек көрсету және ұстап беру туралы екі шарт жасалып, екі тараппен де ратификацияланған. Бүгінгі заң үшінші бағытты реттейді. Келісімшартқа 2023 жылдың 21 тамызында Ханой қаласында қол қойылған», - деді сенатор Наурызбай Байқадамов.
Аталған шарттар екі ел арасындағы сауда-экономикалық, кәсіпкерлік, туристік және басқа да қарым-қатынастардың даму үрдісін ескере отырып жасалған. Мәселен, биылғы тоғыз айда Вьетнамға барған Қазақстан азаматарының саны 106 мыңға дейін өскен.
«Келісім екі тараптың егемендігін, теңдігін және халықаралық нормаларды құрметтеу принциптеріне негізделеді. Аталған шартта «беруші тарап», «қабылдаушы тарап» және «сотталған адам» сияқты негізгі терминдердің нақты анықтамалары берілген. Бюрократиялық кідірістерді болдырмауға және беру процесінде жеделдікті қамтамасыз ету мақсатында тиімді өзара әрекеттесу үшін жауапты орталық органдар ретінде Қазақстан жағынан - Бас прокуратура, Вьетнамнан - Қоғамдық қауіпсіздік министрлігі айқындалған. Шарттың негізгі ережелері негізінде, сотталған адамды беру шарттары және ол үшін талап етілетін құжаттар тізімі реттеледі», - деді депутат.
Атап айтқанда, сотталған адамды беру мына шарттар болған жағдайда жүзеге асырылады:
- сотталған адам «қабылдаушы тараптың» азаматы болуы қажет;
- адам «қабылдаушы тараптың» да ұлттық заңнамасы бойынша қылмыс саналатын іс-әрекеттер үшін сотталған болуы керек;
- беру туралы сұрау салу алынған кезде сотталған адамға қатысты шығарылған үкім заңды күшіне енген және сотталған адамның жазасын өтеуге тиіс уақыт кезеңі кемінде бір жылды құрайтын болуы тиіс;
- сотталған адамның жазбаша келісімі бар болған және екі тарап та беруге келіскен жағдайларда.
«Қабылдаушы тарап» сотталған адамды алғаннан кейін, «беруші тарап» шығарған үкімді өзінің ұлттық заңнамасына сәйкес орындауды жалғастырады.
Бұған дейін Мәжіліс депутаты Нұрсұлтан Бәйтілесов бұл келісім қылмыс жасағаны үшін сотталған екі елдің азаматтарына жазасын өз елінде өтеуге мүмкіндік беретінін айтқан болатын. Демек, сотталғандарды оңалтуға және өз ұлтының қоғамына бейімделуі үшін қолайлы жағдай туғызады.
