Сенатор Абай облысында жылу беру желісінің 65 пайызы тозғанын айтты
АСТАНА. ҚазАқпарат – Сенатор Бақытжан Байахметов еліміздің Премьер-Министрі Әлихан Смайыловтың атына жолдаған депутаттық сауалында жылу және электр энергетика нысандарын қайта жаңғырту мәселесін көтерді, деп хабарлайды ҚазАқпарат тілшісі.
«Статистика деректеріне сәйкес, Абай облысы бойынша жылу беру желілерінің жалпы тозуы – 65 пайыз. Бұл – елдегі ең жоғары көрсеткіш. Осы жағдай жылу беру кезеңінде жылу қуатының тапшылығы мен авариялық жағдайларға себеп болады және жұмыста технологиялық үзілістерге әкеліп соғады», - деді Б. Байахметов.
Депутат Мемлекет басшысы Қасым-Жомарт Тоқаевтың Абай облысына жұмыс сапары барысында инфрақұрылым мәселелеріне, оның ішінде заманауи жылу электр орталығын салуға ерекше назар аударғанын еске салды.
Сенатор Үкіметке Семей қаласындағы ЖЭО-3 құрылысы бойынша жұмыс тобының құрамын нақтылауды, сондай-ақ жылумен қамту нысандарын қаржыландыру мәселелерін пысықтауды ұсынды.
«Бюджет қаражатын пайдалануды оңтайландыру мақсатында жылу энергетика жүйесін реттеу саласындағы функцияларды бір мемлекеттік органға орталықтандыру мүмкіндігін қарастыруды және ЖЭО-3 құрылысы бойынша жұмыс тобының құрамын жаңартып, оның құрамына Парламент депутаттарын қосуды ұсынамыз», - деді Б. Байахметов.
