Сенатта бюджет жобасы талқыланады
АСТАНА. 14 наурыз. ҚазАқпарат - Ертең бейсенбі, 15 наурыз күні ҚР Парламенті Сенатының кезекті отырысы өтеді деп жоспарлануда.
Күн тәртібінде «Қазақстан Республикасының Ұлттық қорынан 2012-2014 жылдарға арналған кепілдендірілген трансферт туралы» Қазақстан Республикасының Заңына өзгеріс енгізу туралы», «2012 - 2014 жылдарға арналған республикалық бюджет туралы» Қазақстан Республикасының Заңына өзгерістер мен толықтырулар енгізу туралы» заң жобалары талқыланады деп күтілуде. Бұл туралы Сенаттың баспасөз қызметінен хабарланды.
Бұдан бөлек, палатаның жалпы отырысына Мәжіліс мақұлдаған Ұжымдық қауіпсіздік туралы шарт ұйымының қызметіне қатысты бірқатар келісімдер де шығарылып отыр.
Сонымен қатар, сенаторлар Тауар таңбалары жөніндегі Сингапур шартын, сондай-ақ Қазақстан мен Үндістан арасындағы Азаматтық істер бойынша құқықтық көмек көрсету туралы шартты талқылайтын болады.
