Серік Ахметов Чемпиондар лигасында жерлестеріне қолдау білдіру үшін «Астана-Арена» стадионына келді
АСТАНА. 30 шілде. ҚазАқпарат - Футболдан УЕФА Чемпиондар лигасының үшінші іріктеу кезеңінің қарағандылық «Шахтер» мен албандық «Скендербеу» арасындағы ойынын тамашалауға Қазақстанның Үкімет басшысы Серік Ахметов келді, деп хабарлайды Vesti.kz.
С. Ахметов 2009- 2012 жылдары Қарағанды облысының әкімі болды. Осы кезеңде «Шахтер» клубына көп көмек көрсетті. С. Ахметов тұсында кеншілер тұңғыш рет Қазақстан чемпионы атанған болатын.
Премьер-Министрден басқа, «Астана-Арена» стадионына жерлестерін қолдауға бокстан 2012 жылғы Олимпиада чемпионы Серік Сәпиев те келді.
Өз командасына жанкүйер болу үшін Астанаға арнайы 4 мыңға жуық қарағандылықтар келген. Кеншілердің ойын алаңы УЕФА талаптарына сай келмейтін болғандықтан, матч «Астана-Арена» стадионында өтеді.
Естеріңізге сала кетейік, «Шахтер» турнирдің алдыңғы ойынында белоруссиялық БАТЭ командасын сенсациялық жағдайда ұтқан болатын. Ал «Скендербеу» де ойламаған жерден Бакудің «Нефтчи» клубын сан соқтырды. Бәсекелестердің арасындағы жауапты матч 6 тамыз күні Тиранада өтеді.
