Серік Ақшолақов елімізде нейрохирургияның дамуына ерен еңбек сіңірді - Елбасы
Медицина ғылымдарының докторы, профессор С.Ақшолақов «Ұлттық нейрохирургия орталығы» АҚ-ның басқарма төрағасы болып табылады, деп хабарлайды ҚазАқпарат.
«Биыл «Қазақстанның Еңбек Ері» атағымен марапатталғандардың бірі Серік Қуандықұлы Ақшолақов. Ол елімізде нейрохирургияның дамуына ерен еңбек сіңіріп, осы салаға басшылық етуде. Отандық ғылым мен медицинаға инвестициялық технологияны енгізуге зор үлесін қосып, еңбегімен тек Қазақстанда ғана емес, өз мамандарының арасында, басқа елдерде де белгілі болып, талай азаматтардың жанын алып қалған адам. Сондықтан ұлы мереке күні осындай марапатқа ие болып отыр», - деді Елбасы.
Сонымен қатар Мемлекет басшысы 30 жыл бойы ауыл шаруашылығында табанды еңбек етіп келе жатқан «Қарасу» СӨК» ЖШС бас директоры Тұрсынов Алмат Жанәбілұлының да «Қазақстанның Еңбек Ері» атанғанын атап өтті.
«Ол басқаратын кәсіпорын өз өнімдерін еліміздің ішіне ғана емес, сонымен бірге экспортқа шығаруды да жолға қойған. Инновациялық технологияларды да белсенді енгізу үстінде. Әлеуметтік саланың да дамуына қолдау білдіріп келеді», - деп атап өтті Назарбаев.