«Севол» кемесінің қаза болған жолаушыларының саны 275 адамға жетті
АСТАНА. ҚазАқпарат - Апатқа ұшыраған «Севол» кемесінің қаза болған жолаушыларын іздеудің 24-ші тәулігінде мерт болғандар саны 275 адамға жетті, тағы 29 адамның мүрдесі әзірше табылар емес. Шетелдік БАҚ-тың хабарлауынша, бұл жайында Чиндо аралында орналасқан Оңтүстік Корея Үкіметінің жедел штабы мәлім етті.
16 сәуірде басталған суасты іздеу жұмыстары ауа райының қолайсыздығына байланысты тоқтатылды. «Желдің күштілігі салдарынан туындаған толқын баржа палубасын қайта-қайта басып кетіп отыр. Соның салдарынан сүңгуірлердің суға түсуі өте қиынға соғуда. Түстен кейін толқын күшейе түседі», - деді жедел штаб өкілі. Ауа райының қолайсыздығы дүйсенбіге дейін жалғасатындығы болжануда.
Естеріңізге сала кетейік, бортында 476 жолаушысы бар паром Оңтүстік Кореяның жағалауында айналдырған екі сағаттың ішінде аударылып, суға батып кеткен. Олардың ішінде негізінен оқушылар мен мұғалімдер болған.
