Сейсенбі елдің басым өңірінде жауын-шашынсыз өтеді -

АСТАНА. 9 қаңтар. ҚазАқпарат - «Қазгидрометтің» болжауынша, 10 қаңтар күні Қазақстанның барлық өңірі кең ауқымды антициклонның ықпалында болады.

Соған орай, сейсенбі көптеген аумақтарда жауын-шашынсыз өтеді деп күтілуде, кей жерлерге тұман түсіп, жел күшейеді.

Атап айтқанда, Қостанай, Солтүстік Қазақстан, Ақмола,Қарағанды облыстарының кей аумақтарында тұман түседі.

Атырау, Жамбыл, Оңтүстік Қазақстан облыстарын тұман басып, секундына 15-20 метр жылдамдықпен жел соғады.

Ақтөбе облысында бұрқасындатып, 15-20 м/с екпінде жел тұрады.

Алматы облысының жекелеген жерлерінде тұманды болады, Жалаңашкөл аумағында секундына 18-23 метр күшпен соғатын желдің екпіні кей уақыттары 28 м/с-қа жетуі ықтимал.

Гидрологиялық болжамдарға сәйкес, Қазақстанның бірқатар сулы нысандарында мұз қату процессі жалғасады. Елдің оңтүстік-шығыс және шығысындағы өзендерде су деңгейі өзгеріп, жекелегені арналарынан тасуы мүмкін.