Шахматтан әлем чемпионаты: Рапидтен үздіктер анықталды
АСТАНА. KAZINFORM – Астанада өтіп жатқан командалық әлем чемпионатының рапид бойынша үздіктері белгілі болды. Алтынды «Al-Ain ACMG UAE» командасы жеңіп алды. Аталған команданың көшбасшысы Даниил Дубовтың соңғы сәттегі жеңісі командаға жеңіс сыйлады.
«Decade China Team» командасы күміспен күптелсе, былтырғы чемпиондары – «WR Chess team» командасы бұл жолы қоланы місе тұтты.
12 турға созылған жарыстың үздік бестігіне төмендегі командалар енді:
1) Al-Ain ACMG UAE (әу баста рейтингте 4 орында тұрды) - 21 командалық ұпай;
2) Decade China Team (2) - 20 ұпай;
3) WR Chess Team (1) - 19 ұпай;
4) Chessy (3) - 18 ұпай;
5) Team MGD1 (6) - 17.
Байқасаңыз, рейтингте жоғары орында тұрған командалар топ жарып, мықтылығын дәлелдеп отыр. Яғни, рейтингте төмен орналасқан команда оза шауып, сенсация тіркелген жоқ.
Қазақстандық командалар арасында үздік нәтижелерге төмендегі командалар ие болды:
10) Kazchess (рейтингтегі орны - 5) - 13 командалық ұпай;
14) Teniz Kazakhstan (13) - 13 ұпай;
19) Astana-2 (21) - 12 ұпай;
20) GMs Kazakhstan (23) – 12 ұпай;
22) Astana-1 (11) - 12 ұпай.
«Бұл өте қиын жарыс болды. Әлемнің барлық үздік ойыншылары жеңіске жету үшін Астанаға жиналды. Бізде жеңіске жетуге үлкен мотивация және жақсы тәжірибе болды, біз әр ойын үшін күрестік деп айта аламыз! Ең қиын раунд Магнус Карлсеннің командасын жеңу болды. Осыдан кейін бізде жаңа тыныс ашылғандай болды», - деді ирандық гроссмейстер Пархам Магсудлу.
Сондай-ақ, жеңімпаз команданың сапында әлем чемпионатының жүлдегерлері Даниил Дубов, Владислав Артемьев, 18 жастағы талант Володар Мурзин, 34 жастағы Дмитрий Андрейкин, Катерина Лагно, Чжу Цзиньере, Ибрагим Ғалымжанұлы және Вафия Дарвиш Әл-Маамари сияқты шахматшылар болғанын атап өткен жөн.
Бүгін блиц бойынша үздіктер анықталатынын атап өткен жөн.
