Шахматтан Азия чемпионаты: Медальдардың барлық топтамасын қазақстандықтар иеленді
НҰР-СҰЛТАН. ҚазАқпарат – Қазақстандық шахматшылар сеньорлар арасындағы Азия чемпионатында рапидтен үздік үш орынның барлығын жеңіп алды, деп хабарлайды ҚазАқпарат Қазақстанның Шахмат федерациясына сілтеме жасап.
«Турнирдің алғашқы күнінен қазақстандықтар үздік нәтиже көрсетті. Бірақ бұл тек рапид қана, ал классикалық шахматтың нағыз тартыстары әлі алда», - дейді чемпионаттың бас төрешісі Олег Ринас. 50 жастан үлкендер арасында Серікбай Темірбаев алтын медаль алды, Олег Головчук - екінші, Валерий Мин үшінші орынды иеленді.
65 жастан асқандар арасында Төлеген Нукин - алтын, Марат Пірімбетов - күміс, Ханиф Құсайынов қола жүлдегер атанды.
Әйелдер арасында павлодарлық Елена Анкудинова 50-ден асқандар арасында алдына жан салмады, екінші орынды жаңа зеландиялық Хелен Миллиган иеленді. 65-тен асқан әйелдер арасында алтын медаль Надежда Искичековаға бұйырды.
«Бүгін классиканың бірінші туры басталады. Онда спортшылардан ерекше зейін мен төзім талап етіледі», - дейді ҚШФ атқарушы директоры Ирина Грищенко.
Жалпы, Азия чемпионатына 16 елдің 70 шахматшысы қатысуда. Дода 18 қыркүйекке дейін жалғасады.
