Шетелдік бокс фанаттары «Канелоның» Головкинмен емес, басқа қарсыласымен айқасқанын қалайды
НҰР-СҰЛТАН. ҚазАқпарат - Talksport.com журналисі Майкл Бенсон өз Twitter-інде мексикалық боксшы Сауль Альварестің (53-1-2, 36 КО) келесі жекпе-жегіне қатысты жанкүйерлердің кімді қалайтындығын анықтау үшін сауалнама жүргізді, деп хабарлайды Sports.kz.
Бенсон дауысқа салу кезінде «Канело» үшін екі нұсқаны көрсеткен — Геннадий Головкинмен (40-1-1, 35 КО) үшінші айқас және Билли Джо Сондерспен (29-0, 14 КО) жекпе-жек.
«Алдағы кездесуде «Канело» үшін кімді қалар едіңіз...» — журналист осындай сауал қойған.
Сондерспен жекпе-жек нұсқасы үшін жанкүйерлердің басым бөлігі — 79,6% , ал қыркүйекте өтетін Головкинмен айқасқа небәрі 20,4% дауыс берген. Дегенмен Геннадийдің бапкерінің айтуынша, қыркүйекте жекпе-жек болмайды.
