Шетелдік инвесторлар кеңесінің кезекті отырысы жұмыс істеп тұрған кәсіпорындарды жаңартуға арналады
СТАНА. Қазанның 21-і. ҚазАқпарат /Марлан Жиембай/ - ҚР Президенті жанындағы Шетелдік инвесторлар кеңесінің кезекті отырысы жұмыс істеп тұрған кәсіпорындарды жаңарту мәселесіне арналмақ. Бұл туралы бүгін елордада өткен баспасөз мәслихаты барысында ҚР Индустрия және жаңа технологиялар бірінші вице-министрі Альберт Рау айтты.
«Президент төрағалығымен өтетін Шетелдік инвесторлар кеңесінің отырысы жаңарту бағдарламасына арналатын болады. Естеріңізде болса, Елбасы істеп тұрған кәсіпорындарға назар аударуды, олардың қызметтеріне сараптама жүргізуді тапсырған болатын», - деді ол.
Сондай-ақ оның атап өтуінше, 9 айды оң нәтижелермен қорытындылаған Индустрия және жаңа технологиялар министрлігінің алдында 4-ші тоқсанда аталған кеңеспен қатар ҚР Президентінің «Алтын сапа» сыйлығын алуға арналған байқау мен «Қазақстанның үздік тауарлары» республикалық байқау-көрмесін өткізу және Индустрияландыру картасы аясында 2-ші жартыжылдықта 80 нысанды іске қосу міндеті тұр.
