Шие құяң ауруына бірден-бір ем болады
АСТАНА. 2 қазан. ҚазАқпарат - Бостон университетінің ғалымдары шиенің адамды құяң талмасы ауруынан қорғайтынын анықтады.
Жаңа зерттеудің қорытындысына қарағанда, буындарына тұз жиналатын адамдардың шиені күніне үш мезгіл жегені дұрыс. Бұл туралы «Алаш айнасы» газеті хабарлайды.
Ресейлік «Новости» агенттігінің хабарлауынша, дәрігер Юйцин Чжаң бастаған ғылыми топ құяң талмасына ұшыраған 633 науқасты тестілеуден өткізген. Олардың орташа жас шамасы - 54-те, 78%-ы - ерлер. Сынақ барысында науқастардың ас мәзіріне 10-12 түйір шиеден тұратын порция қосылып тұрды. Сонымен бірге шие шырыны да берілді. Тәжірибе кезінде талма, әсіресе бас башпайдың құрысуы 1247 рет тіркелген. Ал зерттеуге дейінгі талма деректері бұдан әлдеқайда көп болған екен. Ғалымдардың айтуынша, шиені күніне үш мезгіл тұтынған науқастар талып қалуды сиреткен. Мұның құпиясы: шие сөлі зәр қышқылы тұздарының ұлпаларда қордалануына жол бермей, қабынуларға қарсы тұрады.
