«Шығын 218 млн теңге». Абай облысында 18 барымташы ұсталды

АСТАНА. KAZINFORM — Абай облысында мал ұрлығына қарсы күрес күшейтілді, деп хабарлайды облыстық полиция департаментінің баспасөз қызметі.

Жыл басынаны бері, яғни 10 айда 18 адам ұсталды. 2024 жылдың он айында Абай облысында 94 мал ұрлығы оқиғасы тіркелген. Оның 85%-ы еркін жайылымда орын алған, бұл ұрлық қаупін айтарлықтай арттырады. Ұрлық нәтижесінде жалпы шығын 218,8 млн теңгені құрап, оның 120,8 млн теңгесі өтелді.

— Тергеу барысында мал ұрлығына қатысы бар 18 адам ұсталды, олардың 11-і 4 ұйымдасқан қылмыстық топтың мүшесі. Облыс полициясы мал ұрлығына қарсы күресті белсенді түрде жалғастыруда, бұл жұмыс қатаң бақылауда, — делінген облыстық ПД таратқан ақпаратта.

Қылмыстардың негізгі себептерінің бірі — малдың еркін жайылымда қараусыз қалуы, бұл ұрлыққа жағдай жасайды.

Бұған дейін хабарлағанымыздай, Алматы облысында мал ұрлығына қарсы ауқымды жоба басталды.