Шымкент турнирі: Денис Евсеев 18 жастағы Әмір Омархановты жеңді

АСТАНА. KAZINFORM — Шымкент қаласында екінші рет қатарынан теннистен челленджер турнирі өтіп жатыр.

Бүгін бастапқы айналымда әлемнің 408-ракеткасы Денис Евсеев пен рейтингіде 612-орындағы Әмір Омарханов кортқа шықты.

Тәжірибелі Д.Евсеев 32-де болса, Әмір 18 жастағы еді.

Бұл екеуінің өзара алғашқы кездесуі болатын.

Қос партия да 6:3, 6:3 есебімен Евсеевтің пайдасына шешілді. 1 сағат 18 минутқа созылған бәсекеде Денис 1 эйспен бірге 5 брейк-пойнттың үшеуін өз есебіне жазды. Ә.Омарханов 1 эйспен шектелді.

Денис Евсеев ширек финалға шығу үшін әлемнің 313-ракеткасы, хорватиялық Мили Поличакпен таласады.

Еске сала кетейік, бұдан бұрын Елена Рыбакинаның Мадрид турнирінің ширек финалынан тыс қалғанын жазған болатынбыз.