Шымкенттегі Алпамыс батыр ескерткіші көшірілді
ШЫМКЕНТ. KAZINFORM — Бүгінгі таңда Алпамыс батыр ескерткішінің орнын ауыстыру жұмыстары демеушілер тарапынан жүргізіліп жатыр. Бұл туралы Шымкент қаласы Мәдениет басқармасының баспасөз қызметі мәлімдеді.
Алпамыс батыр ескеркішінің орнын ауыстыру жөніндегі ұсыныс Шымкент қаласының Ардагерлер кеңесінен түскен.
Содан заңнама талаптарына сәйкес ҚР Мәдениет және ақпарат министрлігі жанынан құрылған арнайы комиссия ұсынысты қарап, ескерткіштің орнын ауыстыруға келісім берген.
«Ауыстырылуы жоспарланған ескерткішті орналастыру бойынша ситуациялық эскиздік жобасы дайындалып, белгіленген орындардың меншік иесі мен координациясы анықталды. Бүгінгі таңда аталған ескерткіштің орнын ауыстыру жұмыстары демеушілер тарапынан жүргізіліп жатыр. Ескерткіш Шымкент-Ташкент автожолының бойындағы кілт сәулеттік эскизінің жанына орнатылады», — делінген басқарма тарапынан ұсынылған ақпаратта.
Бұл жұмыстар жылдың соңына дейін аяқталады деп жоспарлануда.
Бұған дейін Шымкентте жекеменшіктегі кейбір әлеуметтік нысандар мемлекетке қайтарылып жатқаны хабарланды.
Сондай-ақ, Шымкентте жыл соңына дейін 1270 адамға пәтер берілетіні белгілі болды.
