Шымкенттегі «көктем» базары көшіріледі

ШЫМКЕНТ. KAZINFORM — Жаңа сауда орталығына барған кәсіпкерлер 1 мамырға дейін жалдау ақысын төлемейді.

Шымкенттегі «көктем» базарының кәсіпкерлері өз қызметін жаңа орында жалғастыра алады. Олар базар жанында орналасқан жаңа үш қабатты сауда орталығына көшеді. Барлық кәсіпкер үшін 2025 жылдың 1 мамырына дейін жалдау ақысы алынбайды, бұл олардың бизнесін еш кедергісіз жүргізуге мүмкіндік береді.

— Алғашқы 3 ай жалдау ақысы — тегін. Кейіннен жалдау құны олардың «Көктем» базарында төлеп жүрген деңгейінде сақталады. Мысалы, егер кәсіпкер бұрын 2×3 метр бутикті жалға алу үшін 25 мың теңге төлеген болса, жаңа сауда орталығында да осындай соманы төлейді. Кәсіпкерлермен түсіндіру жұмыстары жүргізілді. Қосымша сұрақтар бойынша 87424725233 нөміріне хабарласуға болады, — делінген Шымкент қаласы әкімдігінің баспасөз қызметі таратқан ақпаратта.

Жаңа сауда орталығы — заманауи үш қабатты ғимарат, жалпы аумағы 7200 шаршы метрді құрайды. Мұнда кәсіпкерлерге жаңа сауда орындары ұсынылады.

Сауда орталығы келесідей бөлінеді:

1-қабат — сантехника және құрылыс материалдары,
2-қабат — күнделікті тұтыну тауарлары (көкөніс, жеміс-жидек, ет өнімдері),
3-қабат — киім-кешек, ойыншықтар және басқа тауарлар.

Айта кетейік, бұдан бұрын Шымкенттегі дендросаябаққа кіру уақыты мен бағасы өзгергенін жазған болатынбыз.