ШҚО әкімдігінде өрттің неден шыққаны белгілі болды
ӨСКЕМЕН. ҚазАқпарат – Шығыс Қазақстан облыстық әкімдігі ғимаратында өрттің неден шыққандығы белгілі болды, деп хабарлайды ҚазАқпарат тілшісі.
ШҚО төтенше жағдайлар департаменті баспасөз қызметінің мәліметіне сүйенсек, кеше Өскемен қаласындағы М.Горький көшесінде орналасқан әкімдіктің 5-қабатында өрт шыққан.
Көп ұзамай өрт сөндірушілер жалпы ауданы 121 шаршы метрді құраған қызыл жалынды толықтай ауыздықтап, ары қарай таралуына жол бермеді.
«Белгілі болғандай, мәжіліс залындағы еден жанған. Өрттің шығуына – электр жабдықтарының апаттық режимі себеп болды. Қаза болғандар мен зардап шеккендер жоқ. Тілсіз жаумен күреске жеке құрамнан 65 адам мен 17 техника жұмылдырылған», - деп хабарлады ведомство өкілдері.
Естеріңізге сала кетсек, осыған дейін ШҚО әкімдігі ғимаратында өрт шыққанын хабарлаған болатынбыз.
