ШҚО боксшылары Ресейде топ жарды

ӨСКЕМЕН. ҚазАқпарат - Шығысқазақстандық жас боксшылар халықаралық жарыста жүлдегер атанды, - деп хабарлайды ҚазАқпарат тілшісі.

Ресейдің Нововсібір қаласында өткен Александр Невский атындағы кубок жарысына 19 бен 22 жас аралығындағы 100-ге тарта спортшы қатысты.

ШҚО дене шынықтыру және спорт басқармасының баспасөз қызметінің хабарлауынша, облыстың атынан барған 12 боксшының бесеуі алтын, үшеуі күміс және үшеуі қола медаль еншілеген. Атап айтсақ, 49 келіде Мағжан Шайхымұратов,  52 келі салмақта Тілек Қадырханов, 64 келі салмақта Ілияс Мирхатұлы, 81 келіде Тимур Ержанов және 91 келіге дейінгі салмақта Дарын Берікжанов жарыстың ең биік сатысына көтерілді.

Ал, 49 келіде Айбек Рымбекұлы, 60 келіге дейінгі салмақта Бекнұр Ожанов және 75 кг салмақта Әсет Слямбеков күміс медаль алды. Қола медель 56 келі салмақта Мақсұтхан Зарықхановқа, 60 келі салмақта Наурызғали Нұрмұхаметовке және 64 келі салмақта Саят Мұратбековке бұйырды.

Фото: www.sports.kz