ШҚО-да 11 шетелдік құрылыста заңсыз жұмыс істеп жүрген

ӨСКЕМЕН. KAZINFORM – Шығыс Қазақстан облысы Самар ауданында құрылыста заңсыз жұмыс істеп жүрген 11 шетелдік анықталды.

Самар ауылында көші-қон қызметінің мамандары уәкілетті органның рұқсатынсыз жеке тұрғын үйлерде құрылыс жұмыстарына тартылған көрші елдердің 11 азаматын анықтаған. 

«Қазіргі уақытта аталған бұзушылық үшін олар ҚР «Әкімшілік құқық бұзушылық туралы» кодексінің 517-бабы 5-бөлігімен әкімшілік жауапкершілікке тартылды. Шетелдіктерге 25 АЕК (92 300 теңге) айыппұл және 1-ден 3 тәулікке дейінгі мерзімге қамауға алу түріндегі жаза қолданылады», - деп хабарлады ШҚО полиция департаментінен.

Ал жұмыс берушілер шетелдік жұмыс күшін заңсыз тартқаны үшін мемлекет кірісіне 30 АЕК (110 760 теңге) мөлшерінде айыппұл төлейді.

Осы ретте, ШҚО ПД көші-қон қызметі уәкілетті органның рұқсатынсыз Қазақстан аумағында уақытша болатын шетелдік азаматтарды жұмысқа тартуға тыйым салынғанын ескертеді.