ШҚО-да 197 милионнан астам ағаш отырғызылмақ
Мемлекет басшысы өткен жылғы 1 қыркүйектегі ел халқына Жолдауында 2 млрд ағаш отырғызуды және осы жұмыстардың орындалу барысын бақылау үшін интерактивті карта әзірлеуді тапсырған еді. Осыған орай Шығыс Қазақстан облысы әкімдігінде өткен жиналыс барысында өңір аумағын көгалдандыру мәселесі талқыланды.
«Алдағы үш жылда өңірде 197 миллионнан астам ағаш отырғызу көзделген. Аймақ бойынша көгалдандыру жұмыстарын жүргізу үшін нақты жоспар құрылды. Алайда кейбір әкімдер үлкен әлеуеті бар ірі қалаларда отырғызылатын ағаш санын аудандармен бірдей қылып көрсеткен. Бұл дұрыс емес. Сондықтан он күн ішінде осы олқылықтың орнын толықтыруды тапсырдым», - деді ШҚО әкімі Даниал Ахметов.
Естеріңізге сала кетсек, осыған дейін 2 миллиард ағаш отырғызу мақсатында жасалып жатқан жұмысты бақылау үшін интерактивті карта әзірленіп жатқандығы хабарланған болатын.