ШҚО-да 7 адамды кене шақты

ӨСКЕМЕН. KAZINFORM - Шығыс Қазақстан облысында биыл кенелер ерте шықты. Наурыз айының аяғынан бері 7 адам кенеден зардап шеккен.

Барлық оқиға Өскемен қаласының маңында болған.

ШҚО Санитарлық-эпидемиологиялық бақылау департаментінің мәліметінше, қардың тез еруі жәндіктердің саяжайлар мен қала маңындағы аудандарда ерте шығуына әсер етті.

Облыстағы Ұлан, Самар, Күршім, Катонқарағай, Шемонаиха аудандарындағы және Риддер, Өскемен қалаларындағы эндемиялық аймақтарда профилактикалық өңдеу жұмыстары басталып кеткен.

— Тұрғындарға табиғат аясына шыққанда қорғаныс киімдерін киіп, репелленттерді пайдалануды ұсынамыз. Егер сізді кене шағып алса, бірден дәрігерге барыңыз. Зардап шеккен жеті адамның бірі көмекке кеш жүгініп, иммуноглобулин алмаған, - дейді департаменттің қоғаммен байланыс жөніндегі бас маманы Гүлмира Қайратова.

Айта кетейік, кенелер энцефалит вирусын ғана емес, басқа да отызға жуық қауіпті инфекцияларды да тасымалдауы мүмкін.

Еске салсақ, бұған дейін Атырау облысында киікпен келген кене төрт түлікке қауіп төндіргені хабарланған.