ШҚО-да «Евро 5» маркасымен арзан бензин сатылған
ӨСКЕМЕН. ҚазАқпарат – Шығыс Қазақстан облысында жанармай бағасын заңсыз қымбаттату дерегі тіркелді, деп хабарлайды ҚазАқпарат тілшісі.
Бәсекелестікті қорғау және дамыту агенттігі ШҚО бойынша департаментінің мәліметіне сүйенсек, өңірдегі компаниялардың бірі жанармай бағасын заңсыз қымбаттатқан.
Анықталғандай, «Штиф» жанар-жағармай құю стансасы желісінде жанармай сатумен айналысатын «Восток-Логистикс» ЖШС АИ-92 маркалы бензиннің екі түрін саудалаған. Павлодар мұнай-химия зауыты шығарған жанар-жағармайдың литрі 180 теңгеден сатылса, Атырау мұнай өңдеу зауытынан шыққан жанар-жағармайға «АИ-92 Евро 5 АНПЗ» маркасы жазылып, литрі 182 теңгеден сатылған.
«Жанармай құю станциясының операторлары тұтынушылардың қойған сұрақтарына «бензин бағасының әртүрлі болуы «АИ-92 Евро 5 АНПЗ» маркалы бензин сапасының жақсырақтығы себеп» деп түсіндірген. Алайда Қазақстанда «Еуро 5» бензині ұғымы 180 теңге көлемінде сатылатын жанармайда мүлде қолданылмайды. Сондықтан бензинге осындай марканы жазып көрсету – тұтынушыларды жаңылыстырды», - делінген ақпаратта.
Департамент қызметкерлерінің талабынан кейін қазір «Восток-Логистикс» ЖШС заңсыздықты жойды. Баға 180 теңгеге түсірілді.
