ШҚО-да із-түзсіз жоғалып кеткен зейнеткер табылды
ӨСКЕМЕН. ҚазАқпарат – Шығыс Қазақстан облысы Алтай ауданында жоғалып кеткен зейнеткер табылды, деп хабарлайды ҚазАқпарат тілшісі.
ШҚО Полиция департаменті баспаөз қызметінің мәліметіне сүйенсек, Алтай аудандық полиция бөліміне 61 жастағы азамат хабарласқан. Өз сөзінде ол туысының мүлде хабар-ошарсыз кеткенін жеткізді.
63 жастағы зейнеткер кешкі уақытта үйден шығып кетіп, сол күйі қайтып оралмаған. 3 күн бойы тәртіп сақшылары зейнеткерді іздестірді.
«Полиция қызметкерлері жоғалған адамды табу үшін жан-жақты жедел-іздестіру шараларын жүргізді. Соның нәтижесінде, қарт кісінің орналасқан жері анықталды. Белгілі болғандай, ол туыстарымен ренжісіп қалып, құрбысының үйіне кетіп қалған. Қазіргі уақытта зейнеткер үйіне қайтарылды», - делінген ақпаратта.
