ШҚО-да қар құрсауында қалған 4 адам құтқарылды
ӨСКЕМЕН. ҚазАқпарат – Шығыс Қазақстан облысында қар құрсауында қалған 4 адам құтқарылды, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, 15 ақпанда сағат 20.30 шамасында Аягөз қаласынан 15 шақырым жерде ауа райының қолайсыздығына байланысты жолда қалған автокөлікте 3 адам болған.
Олар құтқарушылардан көмек сұрады. ТЖД қызметкерлері техникалық ақауы бар көлікті Аягөз қаласына жеткізді. Азаматтар медициналық көмекке мұқтаж болған жоқ.
«ВАЗ 2115» маркалы автокөлік Жарма ауданы Борсық ауылынан 4 шақырым жерде қар құрсауында қалған. Белгілі болғандай, ер адам құтқарушылардың ескертуіне қарамастан, жалғыз өзі Әуезов ауылынан Өскемен қаласына қарай бет алған.
«112» қызметіне қоңырау шалған тұрғынға департаменттің жедел-құтқару жасағының қызметкерлері көмекке келді. Олар көп ұзамай трос арқылы автокөлікті қардан шығарып Өскеменге дейін жеткізді», - делінген ақпаратта.
