ШҚО-да қатты желден қайықпен жағаға жете алмай қалған екі адам құтқарылды
ӨСКЕМЕН. KAZINFORM – Шығыс Қазақстан облысында құтқарушылар қолайсыз ауа райында су айдынында қалған азаматтарға көмек көрсетті.
ШҚО Төтенше жағдайлар департаменті баспасөз қызметінің мәліметіне сүйенсек, Ұлан ауданы Айыртау ауылындағы Каменское су қоймасы маңында демалып жүрген 1997 жылы туған ер адам мен 1999 жылы туған әйел қайықта отырған.
- Желдің күрт күшеюіне байланысты олар өздігінен жағалауға жете алмаған. Азаматтарға көмекке жедел түрде құтқарушылар келді. Олар ер адам мен әйелді жағаға аман-есен жеткізді, - делінген ақпаратта.
Азаматтарға медициналық көмек қажет болған жоқ.
Еске салсақ, осыған дейін Семейде жаттықтырушы суға батып бара жатқан баланы құтқарғаны хабарланған.
