ШҚО-да қауіпсіздік ережелерін сақтамаудың салдарынан 70 өрт шықты
ӨСКЕМЕН. ҚазАқпарат – Шығыс Қазақстан облысында жыл басынан бері электр жабдықтарын пайдаланған кезде қауіпсіздік ережелерін сақтамаудан 70 өрт шықты, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, өңір бойынша биыл электр жабдықтарын пайдаланған кезде қауіпсіздік ережелерін сақтамаудан 70 өрт болған.
«Мәселен, 8 наурыз күні сағат 18.38-де Семей қаласындағы Нұрбаев көшесінде орналасқан жер үй өртенді. Қызыл жалын шатырды, терезе блогының ағаш құрылымдарын, жиһаз бен жеке заттарды шарпыды. Құтқарушылар өртті сөндіру барысында іштен 2 газ баллонын алып шықты», - делінген ақпаратта.
Сондай-ақ осы күні Шемонаиха ауданында жеке тұрғын үйдің шатыры, және шаруашылық қора-жайлардың ағаш құрылымдары өртенді.
Оқиға орнына №28 өрт сөндіру бөлімінің қызметкері шұғыл келіп жетті. Көп ұзамай жалпы ауданы 80 шаршы метрге жеткен от толықтай сөндірілген.
