ШҚО-да қазан айында халықаралық бүркітшілер фестивалі өтеді

ӨСКЕМЕН. KAZINFORM – Шығыс Қазақстан облысында қазан айында «Шығыс салбұрыны» халықаралық бүркітшілер фестивалі өтеді.

ШҚО әкімдігінің мәліметіне сүйенсек, 10-14 қазан күндері Ұлан ауданы Бозанбай ауылының маңындағы «Бүркіт төбе» алаңында дәстүрлі «Шығыс салбұрыны» халықаралық бүркітшілер фестивалі өтеді.

Фестивальге республиканың әр түкпірінен және шет елдерден, атап айтқанда Моңғолиядан, Венгриядан, Ресейден, Испаниядан, Қытайдан 130-дан астам адам қатысады. Негізгі іс-шаралар 11-12 қазанға жоспарланған. Келетін қонақтардың жалпы саны – 4000-5000 аралығында.

«Бүркіт төбе» алаңында 20-дан астам киіз үй тігіледі. Онда туристер үшін бүркіттер мен сұңқарлар сайысы ғана емес, түйеге отыру, алтыбақан, садақ ату және басқа да көптеген ойын-сауық ұйымдастырылады.

«Фестиваль қонақтарына өңірдің танымал гастрофирмаларынан тамақтану ұйымдастырылмақ. Жарыс бағдарламасына түрлі санаттағы бүркіттер мен сұңқарлар сайысы, «тазы» тұқымындағы жүйрік иттердің жарысы, «жамбы ату» және «теңге ілу» додалары кіреді», - делінген ақпаратта.