ШҚО-да соңғы бес жылда 13 мыңнан астам адамға кәсіпкерлік негіздері оқытылды
ӨСКЕМЕН. ҚазАқпарат – Шығыс Қазақстан облысында «Бастау Бизнес» жобасы аясында 13 мыңнан астам адамға кәсіпкерлік негіздері оқытылды, деп хабарлайды ҚазАқпарат тілшісі.
ШҚО Кәсіпкерлер палатасының директоры Қайрат Мамырбаевтың мәліметіне сүйенсек, биыл «Бастау Бизнес» жобасының іске асырылып жатқанына 5 жыл толды. Осы жылдар ішінде өңір бойынша 13 116 адам кәсіпкерлік негіздерін оқып шықты.
Бүгінде олардың 25%-дан астамы өз кәсібін ашқан. 2 905 адамға жеңілдікпен несие берілсе, 4 097 азамат қайтарымсыз грант алды. 2021 жылда аталған жоба аясында 1 944 адам кәсіпкерлік негіздерін оқыды.
Бизнес өкілдеріне сервистік қызмет көрсетуге қатысты айтар болсақ, осы жылдың 11 айында кәсіпкерлерге Өскемен мен Семей қалаларындағы палата орталықтарының өкілдері 1 400-ден астам қызмет көрсетті. Осы бағыттағы жұмыстар алдағы уақытта да жалғасын таппақ», - деді Қайрат Мамырбаев.
