ШҚО-да тау бөктерінде төрт жарылыс жасалып, 6100 текше метр қар түсірілді

ӨСКЕМЕН. ҚазАқпарат – Шығыс Қазақстан облысында тау бөктерінде 4 жарылыс жасалып, 6100 текше метр қар түсірілді, деп хабарлайды ҚазАқпарат тілшісі.

ШҚО Төтенше жағдайлар департаментінің мәліметіне сүйенсек, өңірде қар көшкінінің алдын алу шарасы Катонқарағай ауданында жүргізілді.

«Қазселденқорғау» ШҚ филиалының қызметкерлері мен құтқарушылар бірлесіп, жергілікті маңызы бар «Согорное-Барлық» тасжолының 16-шақырымындағы тау бөктерінде 4 рет жарылыс жасады. Соның нәтижесінде, 6100 текше метр қар түсірілді. Көшкін жолды толықтай жауып қалды. Бірден жолды қардан тазарту жұмыстары жүргізілді», - делінген ақпаратта.

Ведомство дерегінше, наурыздың алғашқы күндерінде облыста жел соғып, ауа температурасының жылынуы және жауын-шашынның мол жаууы қар көшкіні жүру қаупін арттырып отыр. Сондықтан құтқарушылар жұртшылыққа таулы жерлерге бармау қажеттігін ескертті.