ШҚО-да техника мен жабдықтар сақталған қойма жанып жатыр
ӨСКЕМЕН. ҚазАқпарат - Шемонайха ауданында өрт сөндірушілер техника мен жабдықтар сақтауға арналған жеке қоймадан шыққан өртті сөндіріп жатыр, деп хабарлайды «ҚазАқпарат» ХАА тілшісі.
Қатты аяз бен қойманың ауқымды болуы салдарынан өрт сөндірушілер кедергіге тап болуда, алайда олар ірі техникаларды алып шығып үлгерген.
ТЖД-да хабарлағандай, өрттің шығуы туралы ақпарат күндіз түскен. Кәсіпорындардың біріне тиесілі жеке қойманың шатырынан өрт шыққан.
«№28 өрт сөндіру бөлімі мен Усть-Таловка ауылының жеке өрт сөндіру бекетінің қызметкерлері өрт шыққан жерге келген. 14.38-де тілсіз жау ауыздықталған. Қатты аяз бен құрылым шатырының ағаштан болғаны жағдайды қиындатқан. Өртті сөндіруге жеке құрамның 20 адамы мен 4 техника тартылды», - деп түсіндірді Шемонайха аудандық ТЖБ бастығы Ерік Тойбаев.
Өрттің аумағы 800 шаршы метрді құраған. Оның шығу себебі анықталып жатыр. Ешкім зардап шекпеген.
