ШҚО-да үш күнде мал ұрлығына қатысты 17 қылмыс ашылды
ӨСКЕМЕН. ҚазАқпарат – Шығыс Қазақстан облысында үш күн ішінде мал ұрлығына қатысты 17 қылмыс ашылды, деп хабарлайды ҚазАқпарат тілшісі.
ШҚО Полиция департаменті баспасөз қызметінің мәліметіне сүйенсек, өңір аумағында 15 қарашадан бастап «Мал ұрлығы» жедел алдын алу шарасы жүргізілуде. Полиция қызметкерлері 3 күн ішінде 17 қылмысты ашқан. Сондай-ақ 66 бас мал табылып, иелеріне қайтарылды.
«Қараусыз жайылып жүрген 723 мал арнайы тұраққа қамалды. Мал жаю ережелерін бұзғаны үшін 148 шаруагер ҚР ӘҚБтК-нің 408-бабы бойынша әкімшілік жауапкершілікке тартылды», - делінген ақпаратта.
Шара барысында мал және ет өнімдерін тасымалдайтын 571 автокөлік, 427 шаруа қожалығы мен ет сатылатын 197 сауда орны тексерілді. Ветеринария саласында құқық бұзушылық жасаған 45 адамға ӘҚБтК-нің 406-бабына сәйкес айыппұл салынды.
