ШҚО-да жаңа жылда қанша нәресте дүниеге келді

СЕМЕЙ. ҚазАқпарат – Шығыс Қазақстан облысында қысқы демалыс кезінде 200 нәресте дүнеге келді, деп хабарлайды «ҚазАқпарат» ХАА ШҚО денсаулық сақтау басқармасының баспасөз қызметіне сілтеме жасап.

Дәрігерлердің айтуынша, мереке күндері босандыру мекемелері әдеттегі режим бойынша жұмыс істеді.

«2020 жылдың 1-6 қаңтары аралығында перенаталдық орталықтар мен аудандық ауруханалардың перзентханалар үйінде 200 бала дүниеге есігін ашқан»,-деп нақтылады облыстық денсаулық сақтау басқармасының баспасөз қызметі.

Жалпы алғанда, босандыру мекемелерінің мамандарының айтуынша, 2019 жылы нәрестелер көп туған. Облыста жыл бойына 21 386 бала дүние есігін ашса, олардың 179-ы егіздер.

Жаңа жыл қарсаңында жаңа жылдық мерекелердің соңына дейін жалғасқан ерекше акция өтті. Нәрестелердің барлығы ерекше киіндірілді. Медициналық ұйым өкілдері балаларды арнайы тіктірген киімдермен шығарып салды.