ШҚО-дағы жолдардың бірінде көлік қозғалысына тыйым салынды

ШҚО төтенше жағдайлар департаменті баспасөз қызметінің мәліметіне сүйенсек, өңірде ауа райының нашарлауына, нақты айтқанда жолдың дұрыс көрінбеуіне байланысты жолдардың бірі жабылды.

«29 қараша сағат 21-00-ден бастап облыстық маңызы бар Васильевка-Бозанбай-Алғабас-Тарғын тасжолының 21-36 шақырымында көліктің барлық түрі үшін қозғалысқа тыйым салынды. Сондықтан жүргізушілерге өз маршруттарын алдын ала жоспарлап алуды сұраймыз», - делінген ақпаратта.

Осы ретте, құтқарушылар халыққа жолдардың жай-күйін «Дәрмен» мобильді қосымшасы арқылы біліп отыруға кеңес берді. 

Еске салсақ, бүгін түсте Қызылорда және Ақтөбе облыстарында көлік қозғалысына шектеу қойылғаны хабарланған.