ШҚО-дағы жүк пойызының рельстен шығуы жолаушы пойыздарының қозғалысына әсер ете ме
Шығыс Қазақстан облысындағы «Бұқтырма-Заводинка» теміржолында жүй пойызының рельстен шығып кетуі жолаушы пойыздарының қозғалысына әсер етпейді, деп хабарлайды Kazinform.
ШҚО бойынша көліктік бақылау инспекциясының мәліметіне сүйенсек, қазіргі уақытта жүк пойызының рельстен шығып кетуіне байланысты тексеру жүргізілуде.
«Машинист тежеу магистралындағы қысымның төмендеуіне байланысты пойызды тоқтатқан. Осылайша, 13-тен 24-ке дейінгі вагондар рельстен шығып кетті. Оқиғаның себебі анықталып жатыр», - делінген ақпаратта.
Сол жерге вагондарды көтеретін арнайы пойыз жіберілген.
«Аталған учаскемен жолаушылар пойызы ертең жүреді. Оған дейін тиісті жұмыстар аяқталады. Яғни, вагондардың рельстен шығып кетуі жолаушы пойыздарының қозғалысына әсер етпейді», - делінген хабарламада.
Еске салсақ, осыған дейін Шығыс Қазақстанда жүк пойызы рельстен шығып кеткені хабарланған.
