ШҚО-дағы жер үйлерде өрт қауіпсіздігін бұзудың 27 мыңға жуық фактісі анықталды
ӨСКЕМЕН. ҚазАқпарат – Шығыс Қазақстан облысында биыл жер үйлерде өрт қауіпсіздігін бұзудың 27 мыңға жуық фактісі анықталды, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, жыл басынан бері құтқарушылар жер үйлерді аралап, 200 000-нан астам нұсқаулық жүргізді. Соның барысында өрт қауіпсіздігі ережелерін бұзудың 27 000-ға жуық фактісі анықталды.
«Оның 13000-нан астамы пешті пайдалану кезінде өрт қауіпсіздігі ережелерін сақтамауға, 9000-нан астамы электр жабдықтарын қолданғанда қауіпсіздік талаптарының бұзылуына байланысты болып отыр. ТЖД мамандарының уақтылы жүргізілген алдын алу шараларының арқасында бүгінде тұрғындар 5000-нан астам бұзушылықты жойды. Үй иелеріне пешті жылыту және электр аспаптарын пайдалану ережелері бойынша егжей-тегжейлі нұсқаулықтар өткізілді», - делінген ақпаратта.
Рейдтерден бөлек, құтқарушылар әлеуметтік осал санаттағы отбасылардың үйлеріне өрт шыққанын хабарлайтын датчиктерді орнатуда. Қазіргі уақытта 2000-нан астам үйге осындай құрылғы орнатылған.
Айта кетейік, 2022 жылдың басынан бері облыс бойынша жер үйлерде 744 өрт шыққан. Ал 2021 жылдың осы кезеңінде 782 рет өрт болды.
