ШҚО халқының 80 пайызы коронавирусқа қарсы вакцина салдырды
ӨСКЕМЕН. ҚазАқпарат – Шығыс Қазақстан облысы тұрғындарының 80,1 пайызы коронавирусқа қарсы вакцинаның бірінші компонентін алған, деп хабарлайды ҚазАқпарат тілшісі.
ШҚО әкімдігінің мәліметіне сүйенсек, 15 қазандағы жағдай бойынша өңір жұртшылығы арасында COVID-19 инфекциясына қарсы екпенің бірінші компонентін алғандар үлесі – 80,1 пайызды құрап отыр. Ал жалпы халықтың 66,5 пайызы вакцинаның екі компонентін де салдырған.
«Бірінші компонент бойынша Аягөз, Үржар, Бесқарағай аудандары көш басында тұр. Онда тұрғындардың 99,5% екпе алды. Ал екі компонентті де салдыру көрсеткішінде Бесқарағай (90,4%), Үржар (88,2%) және Зайсан (87,2%) аудандары алдыңға қатарда. Ал ең төменгі орында – Шемонаиха ауданы тұр (53,2%)», - делінген ақпаратта.
Соңғы тәулікті Шығыс Қазақстанда 116 адам қауіпті дертке шалдыққан. Бүгінгі таңда облыс вирус жұқтыру көрсеткіші бойынша «сары аймақта» тұр.
