ШҚО-ның «Алтай» волейбол командасы Қазақстан кубогын жеңіп алды

АСТАНА. ҚазАқпарат - Өскеменде әйелдер арасында волейболдан өткен Қазақстан Республикасы кубогында шығысқазақстандық «Алтай» командасы жеңіске жетті, деп хабарлайды «ҚазАқпарат» ХАА тілшісі ШҚО Дене шынықтыру және спорт басқармасының баспасөз қызметіне сілтеме жасап.

Шығыстан шыққан команда Павлодарлық «Ертіс-Қазхром» командасымен ақтық сында кездесіп, ойын 5 сетке дейін созылған. Тартысты бәсеке соңында 2:3 есебімен жеңіске жеткен «Алтай» ойыншылары Қазақстан Кубогының иегері атанды.

Жеңімпаз команданы Шығыс Қазақстан облысының әкімі Даниал Ахметов құттықтады.

«Сіздерді Қазақстан Республикасы Кубогы ойындарының аяқталуымен шын жүректен құттықтаймын. Болашақта «Алтай» командасын әлем чемпионатында, Токиода өтетін Олимпиада ойындарында көргіміз келеді. Біз ол үшін қолдан келгенді аянбай, қолдау көрсетеміз. Біз сіздерді мақтан тұтамыз», - деді Даниал Ахметов.

«Алтай» сапындағы Сана Анарқұлова құрамадағы «Үздік ойыншы» номинациясын алды.

Қазақстан Кубогында екінші орынды павлодарлық команда иеленсе, үшінші орынды «Жетісу» командасы алған. Ал Шығыс Қазақстанның намысын қорғаған екінші «Алтай2» командасы төртінші орыннан көрініп отыр.