ШҚО тауларында жарылыс жасалып, қар түсіріліп жатыр

ӨСКЕМЕН. ҚазАқпарат – Шығыс Қазақстан облысында қар көшкінінің алдын алу үшін тауда 2 рет жарылыс жасалды, деп хабарлайды ҚазАқпарат тілшісі.

ШҚО Төтенше жағдайлар департаменті баспасөз қызметінің мәліметіне сүйенсек, «Қазселденқорғау» ШҚ филиалының мамандары мен құтқарушылар қар көшкінінің алдын алу шарасын «Өскемен-Алтай» тасжолының учаскесінде жүргізді.

Тау бөктерінде екі рет жарылыс жасалып, барлығы 3600 текше метр қар түсірілді. Толықтай қар жауып қалған жол көп ұзамай тазартылды. Қыс басталғалы облыс бойынша жасанды жолмен 266 060 текше метр қар түсірілген. Жалпы Шығыс Қазақстанда қар көшкіні басып қалуы мүмкін 497 учаске бар.

«Тауда жиналған қар кез келген уақытта көшкінге айналып, жолды жауып қалуы ықтимал. Әсіресе суық ауа райынан кейін күн күрт жылынып кеткенде қауіпті», - дейді «Қазселденқорғау» ШҚ филиалының басшысы Омар Дүзгімбаев.