Шорт-трекшілер маусымы: алғашқы кезеңге Қазақстаннан кімдер қатысады
АСТАНА. ҚазАқпарат – Ертең, 28 қазанда Канаданың Монреаль қаласында шорт-тректен Әлем Кубогінің алғашқы кезеңі басталады, деп хабарлайды ҚазАқпарат «Cпортты дамыту дирекциясына» сілтеме жасап.
Биылғы маусымдағы бірінші жарыс даңқты хоккейші Морис Ришар атындағы аренада 30 қазанға дейін жалғасады. Мұнда тек Қазақстан ерлер құрамасы сынға түспек. Әйелдер құрамасы Солт-Лейк-Сити қаласы қабылдайтын 2-кезеңге қатысады.
Ұлттық құрама тізімі: Нұртілек Қажығали, Абзал Әжғалиев, Әділ Ғалиахметов, Денис Никиша.
Бас бапкер – Нұрберген Жұмағазиев.
Жарыс қарсаңында конькишілердің жаңа спорт киімі де назарға ұсынылды.
Айта кетейік, Монреальда осыған дейін 1987, 2002, 2014, 2018 бен 2021 жылы шорт-тректен Әлем Кубогінің кезеңі өткен. Биылдан бастап барлық 6 кезеңнен соң ерлер мен әйелдер арасындағы жалпы есептің жеңімпазы «Гауһар глобусқа» ие болады.
Әлем Кубогінің келесі кезеңдері:
2-кезең – Солт-Лейк-Сити (АҚШ), 4-6 қараша;
3-кезең – Алматы (Қазақстан), 9-11 желтоқсан;
4-кезең – Алматы (Қазақстан), 16-18 желтоқсан;
5-кезең – Дрезден (Германия), 3-5 ақпан;
6-кезең – Дордрехт (Нидерланд), 10-12 ақпан;
Желтоқсанда араға 4 жыл салып Әлем Кубогі кезеңі Алматыға қайта оралады. Елімізде алғаш мәрте өткен 2018 жылғы бәсекеде (маусымдағы 3-кезең) Абзал Әжғалиев 500 метрге жарыста қола жүлдегер атанған-ды.
Фото: kazsports.kz
