Шотландияда пойыз өртеніп, үш адам қаза тапты
ЛОНДОН. ҚазАқпарат – Сәрсенбі күні Шотландиядағы Абердиншир округінде жолаушылар пойызы рельстен шығып кетіп, үш адам мерт болды, деп хабарлайды ҚазАқпарат британдық көлік полициясының сайтына сілтеме жасап.
Қаза тапқандардың бірі - пойыз машинисі. Алты адам әртүрлі жарақаттармен ауруханаға жатқызылды.
Сәрсенбі күні таңертең Ұлыбритания көлік полициясы жергілікті уақыт бойынша сағат 09:43 қаланың Стоунхейвен ауданында пойыздың рельстен шығып кеткендігі туралы деректер түскендігін мәлім еткен.
Ал Би-би-си соло жерде аспанға қою түтіннің көтерілгенін, өрт болып жатқанын хабарлаған. Оқиға орнына оншақты полиция машинасы, өрт сөндіру бөлімшелері және жедел жәрдем көліктері, сондай-ақ құтқару тікұшағы келіп жеткен.
Press Association дереккөзінің мәліметтеріне қарағанда, келеңсіз жағдайға Шотландияның солтүстігінде толассыз жауған жауын салдарынан болған көшкін себеп. Локомотив және төрт вагон рельстен шығып кетіп, аударылған.
