Шу облысындағы жол апатында 5 қырғызстандық қаза тапты, 5 қазақстандық жарақаттанды

АСТАНА. ҚазАқпарат - Қырғызстанның Шу облысында болған жол-көлік апатында жапа шеккендердің ішінде бес Қазақстан азаматы мен бір Ресей азаматы болған.

Бұл туралы КирТАГ құқық қорғау органдарына сілтеме жасап хабарлады.

«Кеше, 15 шілдеде шамамен сағат 09:00 Volkswagen Golf мен Toyota Avensis Verso көліктері соқтығысты. Бірінші көлікті 31 жастағы ер адам, екіншісін 29 жастағы ер адам жүргізген. Жол-көлік апаты салдарынан екі жүргізуші мен Volkswagen Golf көлігінің жолаушылары - 35 жастағы Алтынбек, 28 жастағы Нұрлан және 23 жастағы Майрамбек оқиға орнында ажал құшты», - деп хабарлаған құқық қорғау органдарынан.

ТЖМ айтқандай, жапа шеккендердің ішінде бес қазақстандық бар.

Volkswagen Golf көлігінің бір жолаушысы - 32 жастағы Айтбай мен Toyota Avensis Verso жолаушылары 44 жастағы Жанна, 38 жастағы Әсел, 41 жастағы Гүлнар, 13 жастағы Шернияз бен 7 жасар Арсен, 59 жастағы Айжан Иссик-Ата аудандық ауруханасына жеткізілді.

«Toyota Avensis Verso көлігінің барлық жолаушылары Қазақстан азаматы, олардың бірі 59 жастағы әйел - Ресей азаматы.

Volkswagen Golf көлігі Токмокқа бара жатса, Toyota Avensis Verso Ыстықкөлден келе жатқан», - деп хабарлады милициядағылар.