ШҰҒЫЛ: Алматы қаласы қозғалмайтын мүлік орталығының директоры С. Оразақыновқа қатысты пара алу фактісі бойынша қылмыстық іс қозғалды - қаржы полициясы
АСТАНА. 12 желтоқсан. ҚазАқпарат - Қаржы полициясы агенттігінің қызметкерлері ағымдағы жылдың қыркүйек және желтоқсан айларының аралығында жүргізілген жедел-іздестіру іс-шараларының нәтижесінде 4 ай бойы жүйелі түрде пара алды деген күдікпен
«Алматы қаласының қозғалмайтын мүлік орталығы» республикалық мемлекеттік қазыналық кәсіпорнының директоры С. Оразақыновты ұстады. Бұл туралы ҚР Экономикалық қылмысқа және сыбайлас жемқорлыққа қарсы күрес агенттігінің баспасөз қызметі хабарлады.
Мөлшері 80 мың теңгеден 250 мың теңгеге дейін жетіп отырған пара Алматы қаласындағы қозғалмайтын мүліктің техникалық паспорттарын тез және кедергісіз рәсімдеу үшін, сондай-ақ тұрғын үйлерді қайта құруды заңдастыру үшін беріліп отырған.
Оразақыновқа қатысты бірнеше рет пара алу фактісі бойынша қылмыстық іс қозғалды.
Қылмыстық іс тергелуде, өзге ақпарат тергеу мүддесіне байланысты жарияланбайды.
