ШҰҒЫЛ: Астана әуежайында Ыстамбұл бағытындағы ұшаққа бомбасы бар жолаушы мінгендігін хабарлаған ер адам ұсталды
АСТАНА. 18 қаңтар. ҚазАқпарат - Кеше сағат 19.30-да полицияға Ыстамбұл бағытымен ұшып шықпақ ұшақтың бортына жарылғыш затты алып кірген жолаушы туралы айтқан белгісіз біреудің қоңырауы туралы хабарланды.
Бұл туралы ҚР ІІМ Көліктегі ІІД-нің баспасөз қызметінен мәлім етті.
Дабыл бойынша желілік полиция бөлімінің жеке құрамы көтерілді, оқиға орнына Астана қаласы бойынша көліктегі ішкі істер департаментінің, ҰҚК мен ТЖ департаменттерінің, прокуратура және жедел-жәрдем қызметкерлері шықты.
Полиция қызметкерлері 88 жолаушы мен экипаждың 8 мүшесін қауіпсіз аумаққа шығарды, одан кейін әуе кемесі жолаушылар терминалынан қауіпсіз жерге жеткізілді. «Арлан» арнайы бөлімшесінің саперлары ұшақтың бортын және жолаушылардың жүктерін тексерді. Жарылғыш зат табылмады.
Жедел-іздестіру іс-шарасын өткізу барысында көліктегі полиция қызметкерлері жарылғыш зат туралы өзінің ұялы телефонынан хабарлаған 42 жастағы астаналық тұрғынды ұстады. Күдікті уақытша оқшаулау абақтысына қамалды.
ҚР ҚК-нің 242-бабы бойынша (лаңкестік актісі жөнінде жалған ақпарат тарату) қылмыстық іс қозғалды.
