ШҰҒЫЛ: Қостанай облысында өлтірілген полиция қызметкерінің мәйіті табылды
ҚОСТАНАЙ. 28 тамыз. ҚазАқпарат - Рудный қаласындағы мамандандырылған күзет қызметінің 28 жасар қызметкері өлтірілді, деп хабарлады Қостанай облысы ІІД-нің баспасөз қызметі.
Оның мәйіті 27 тамызда Федоров ауданына қарасты Андреевка кентінің маңында орналасқан орманнан табылды. Бастапқыда келіп түскен ақпаратқа қарағанда, полиция қызметкері қылқындырып өлтірілген.
Жүргізілген жедел-іздестіру шарасы барысында Рудный қаласының 27 және 29 жастағы тұрғындары ұсталды. Олар полиция қызметкерінің танысы болған.
ҚР ҚК-нің 96 бабы 1 бөлімі бойынша қылмыстық іс қозғалды. Тексеру амалдарының болжамы бойынша, кісі өлтіру оқиғасы қызғаншақтықтың салдарынан болған. Сараптама белгіленді, тексеру амалдары жүргізілуде.
